محـلــى شـــرب الكـاس
( من أكاذيب الغزل )
محلى شرب الكاس و الكـاس ايـونـــس *** و الساقي تانيـــس ما هو من نـاســـي
عارفـلـــي دقـــات قلبــي واش ايحـــس *** و فاهملي موجــات حسي و حساســي
و يتحس بشيطان شعــري كي يهـمــس *** في وذني بكـــلام يقـلـــب سنقـاســـــي
و يسقيني من كاس ممزوج ايرســـرس *** ممزوج بلغـــــرام نكهة في راســــــي
ما هو شرب احــرام مــولاه ايهـلــــوس *** كي يفرغ ذا الكاس يطمع في كاســــي
ما هو شرب اللـــي ايسكـــر و اينـعـــس *** ما هو شرب اللي ايكثر وســواســــي
ما هو شرب ايروق كاســو في مجـلــس *** ما هو شرب اللي اينقص من باســـي
ما هو شرب امجون و البايـــع منحـــس *** و الشارب سفاح من صغرو قـاســــي
ما هو شرب املوك و الساقــي يهـــوس *** في وذن السلطان كيفـاش أيـواســــي
ذا الكاس اللي بيه شيطـانـي يهـجـــــس *** يحلى وقت الليل في وقــت انعـاســــي
و اتـنــــام العـــذال و الليـــل ايحـنـــدس *** و نعيا من لكـــلام و ادق أجــراســــي
كي نشرب ذا الكاس نصحى و انعسعس *** و لا ريحة في الكاس من ريح انفاسي
و الهيفــــا بعـيــون مذبـالــــة تنعـــــس *** سلابـــــة لعـقـــول زادت تهـواســـــي
مطبوعة برموش بمضــــاوة تلـحـــــس *** جرحتنـــي و اضحيت مسقوم انقاسـي
عجبتني و الطول مـقـــــدود امسـلــــس *** طولة زينة جات عن حسب اقياســـــي
بسمتهــــــا بــــراق منـــو نتحـســــــس *** تحت ابراج ايزيد نـــــار لتهجـاســـــي
و النظرة بــارود و الحــــي منـحــــــس *** قتال بلا حــــس ما هـــو قــرطـاســــي
و الشعر مع الريح يطلـع و ايـقــــــوس *** و طاح على لجنــاب ثـــور خـنـاســــي
و الشرب الممزوج بالحــب امغــمــــس *** من عين الهيفات نملـي في طـاســـــي
و لا ساقي لا كاس بيهـــم نتــونـــــــس *** ما نبغـــي مشروب يهبيـلـــي ساســـي
مشروبي نظرات و اعيــون اتهـــــوس *** ذا خـمــــر العـشــاق للـــي هو ناســـي
نشوة دون امدام و العاشــق يحـــــدس *** لا نشوة مخمــــور تلعــب في راســــي
و لا نشوة مغروم غير انا نهــــــــوس *** و انخاطب في ناس من طبع اجناســـي
قالو لاش ابطيت ضـــاري تتحـمـــــس *** واش بيك اسعــــدون ديما متنــاســــي
قلت انلبي ياك و العاقــــــل يتـحـــــس *** لعــلــي نرضـــي الغـــاوي من ناســــي
